Nahalukay po ito ng inyong abang lingkod mula sa kanyang baol. Ito ay kuha noong 2009 Summer Carnival sa siyudad na malapit sa amin. Inaabangan ito ng maraming tao dahilan sa pagpaparada ng mga kababaihan, kalalakihan, matanda o bata sa kahabaan ng lansangan ng Rotterdam. Bukod sa makukulay na costumes nila (na hindi nyo makikita sa 2 larawang ito..pasensya na po at hindi kagandahan lalo na ang gusali sa unang larawan kaya ginawa ko na lamang ganyan ang kulay) ay talagang kay lalambot ng kanilang mga katawan na siyang nagpapaindak sa mga nanonood sa kanila.

Ang 2 babaeng ito ang kumuha ng aking atensyon. Ang una ay dahilan sa kanyang tila mahiyaing mukha , ganunpaman ay hindi mahiyain ang kanyang indak.

At ang pangalawang binibini ay talagang bigay na bigay hindi lang ang lambot ng katawan sa pagsayaw subalit pati na rin ang kanyang mga halakhak at ngiti! Game na game rin syang mag pose kapag nakakakita ng camera! Isa pa ang hinding hindi ko makakalimutan ay ang kanyang mukha na nagpa-alala sa akin kay Diana Ross at Michael Jackson, walang biro!

Sana naman ay napangiti kayo ng may malalambot na katawan na mga binibining ito

Maligayang araw ng Litratong Pinoy sa inyong lahat!

Bago din po tayo magsimula ay gusto lamang naming ipaalala na patuloy po tayong tumatanggap ng mga lahok para sa ating proyektong: “L.P. goes to..” at “Photo Tips and Tricks” max 2 litrato po bawat  lahok. Ipadala lamang sa: litratongpinoy@gmail.com ang inyong mga lahok. Sa mga nag-iwan ng komento naman po sa “PHOTONUTS” abangan nyo silang muli sa ikalawang Linggo ng Marso. Maraming salamat!

Tara na, simulan na natin!

KALIKASAN. Nature.

Sa mga delubyong sanhi ng kapabayaan at pagwasak ng mismong tao sa kanyang kalikasan, natatakot ka ba?

Ang aking sagot ay oo. OO sapagkat kung patuloy na mismong tayong tao ang sisira ng ating kalikasan ay tiyak wala ng aabutan pa ang mga hindi pa isinisilang. Nakakalungkot isipin pero paano na sila, paano na ang kinabukasan nila? Mga puno ay tinitibak. Mga bundok ay kinakalbo. Mga hayop ay walang awang pinapatay sa pamamagitan ng pag-hunting para lamang sa tropeo. Mga lupaing dapat na sakop ng mga hayop ay sinasakop na ng tao dahil sa kanyang pangangailangan na palakihin ang kanyang mundo. Mga dagat na tinatapunan ng nakamamatay na lason. Pag-gamit ng dinamita sa pangingisda na hindi lamang munting isda ang nangangamatay ngunit pati na rin ang mga corals. At marami pa. Marami pa tayong dapat pag-isipan, pagbuhusan ng panahon, madaming dapat ituwid sa ating mga ginagawa.

Dahil kung hindi, baka ultimong mga ibon ay sa mga larawan na lamang makikita ng mga anak ng ating mga anak. Nakakalungkot naman.

Isang magandang Litratong Pinoy na Huwebes sa inyong lahat!

Makapal o ‘thick’ sa Inglis.

Dahilan na walang ‘winter’ sa atin sa Pilipinas, maraming kababayan ang nagnanais na makaranas nito. “Sana naman makakita o mahawakan ko man lang ang snow, masaya na ako” hiling ng iba.

Totoo, magandang makita na maputi ang paligid kapag nababalot nito. Masayang gumawa ng ‘snowman’, mag ice skate sa mga tumigas na tubig sa sapa, o makipag batuhan ng snowball! Pero may hatid din na hindi maganda kapag sobrang kapal ng snow ang nahuhulog mula sa kalangitan.

Maraming aksidente ang nangyayari sa labas dulot nito. Mahirap para sa mga sasakyan: kotse, tren o eroplano  ang bumiyahe.

Pero walang magagawa. Hindi natin mapipigil ang kalikasan sa kanyang gustong ibigay sa atin.

Manatiling positibo kahit nanginginig sa kapal ng niyebe, ayos lang. I-enjoy na lang ika nga, tutal matatapos din ang panahon ng tag-lamig!

Happy LP po sa inyong lahat!

Bago tayo magsimula ay pag-usapan muna natin ang konting pagbabago sa LP. kahit saglit lang. Alam nyo na bang lahat na hindi lang sa mga blogs natin pwede gumawa ng akda para sa LP kung hindi ay pwedeng-pwede na rin sa inyong Facebook Wall at Flickr Page! Mayroon pong mga interesadong sumali sa L.P. (naibulong po sa amin) pero wala silang blogs kundi facebook at flickr lang. Kaya ngayon, mas madali na ang sumali at makisaya sa ating grupo tuwing Huwebes! Alam nyo din ba na wala na tayong blogroll? Hindi nyo pa alam? Naku i-click nyo lang ang mga ‘pages’ para sa karagdagang impormasyon.
Eto pa ang isang ‘exciting’ na balita. Alam nyo ba’ng malapit nyo nang matunghayan ang PHOTONUTS sa LP? ‘Ano yung PHOTONUTS?’ Sekreto muna ha! ha! ha! Sya nga po pala, ang mga bagong balita ay matutunghayan ninyo sa ating sidebar, huwag nyo pong kalilimutan.

‘Yan lang po muna kaya naman…..umpisahan na natin!

HUDYAT o sinyal, alarma, tanda, babala, senyas. Ang salitang ito ay ginagamit depende sa uri ng pagkakataon. Gagamitin ko po ito bilang alarma.

Tayo na may mga maagang trabaho o kahit na sa gabi pa ito,  ay kinakailangan natin ang tulong upang tayo ay magising ng tama sa oras. Syempre naman ito ay sa kadahilanang ayaw nating mahuli sa ating patutunguan. Gamit din ito ng mga estudyante para hindi mahuli sa eskuela. Alarma sa orasan o celphone, tiyak magigising pati ang kasambahay sa handog na hudyat nito!

teka….paano naman yung parang mantika matulog? May silbi kaya sa kanila ang hudyat na ito?

Magandang araw ng Huwebes ng L.P. sa inyong lahat! It’s great to be back!

Gaano katotoo ang paniniwala ng iba na kapag nangangamoy bulaklak (samantalang wala namang bulaklak sa iyong paligid)  ay may kaluluwang dumadalaw sa iyo? Naniniwala ka ba na totoo ito? Ang sabi din ng iba na kung may kakilala kang namatay ay isang paraan ang pangangamoy bulaklak upang ipaalam sa iyo ang kanilang pagpanaw. Nakaranas ka na nito?

Kung ako ang inyong tatanungin ay hindi ako naniniwala dito. Pero sadyang may mga nagaganap sa ating paligid na hindi natin kayang ipaliwanag dahil nakaranas na akong makaamoy ng bulaklak dito sa abroad ng may mamatay na miyembro ng aming pamilya sa Pilipinas. 2 beses itong nangyari.

Malapit na ang pag-gunita ng araw ng mga yumao. Bumabango na ba sa paligid mo?

MALIGAYANG HUWEBES NG LITRATONG PINOY SA INYONG LAHAT!

——————————————————————————————————–

Anunsiyo:

Mahal kong LP members (at mga gustong sumali),

Pansamantala pong ‘magbabakasyon’ ang Litratong Pinoy sa susunod na 4 na linggo (buong buwan ng Nobyembre) at magbabalik po sa unang Huwebes ng Disyembre. Dahilan po sa:

• Lilipat po tayo sa bagong webhost.
  
• Ang bagong L.P. team ay aming ipakikilala sa Disyembre!
• Magkakaroon po ng bagong bahagi ang L.P.  Abangan po ninyo sa ating pagbabalik.
• Magsisimula po tayong malinis ang ating listahan ng miyembro maliban na lamang po sa mga sumali sa nakaraang 3 buwan, sigurado pong hindi mawawala ang inyong mga blogs sa listahan.
• Amin pong ilalathala ang mga bagong themes para sa Disyembre, abangan lamang po ninyo.

Madami po kaming aayusin kaya’t kailangan po ang 1 buwan na bakasyon. Magkikita-kita po tayong muli sa Disyembre, huwag ninyong kalilimutan.

We’ll be back bigger and better!

Maraming salamat po sa inyong pag-unawa. – admin