Sa lahat ng mga panlasa, sa asim ako pinaka mahina. Ang kulang pa sa iba ay sobra na para sa akin. Ito ang dahilan kung bakit hindi ko kinasanayan ang pagkain ng samapalok at manggang hilaw.

Maligayang maulan na Huwebes mga ka LP!

Maliliit man silang tignan kapag nasa himpapawid ay tunay naman silang malalaki kapag nasa iyong harapan na. Hindi ba at tulad din sila ng ating mga problema at pagsubok na malimit ay nakapanglulula. Ngunit kung tayo lamang ay aatras upang makita ang kabuuan ng sitwasyon ay ating mapapansin na may mas marami pang magagandang bagay na higit na malaki sa ating mga suliranin.

Kahit na gaano pa man naging mapanglaw ang ating buhay, pasasaan ba at may liwanag at kulay pa rin tayong masisilayan. Basta’t alam mo lamang kung saan titingin, kadiliman ay mapapawi rin.

Maligayang unang araw ng “-ber” months mga ka LP!

Kapag wala ka na sa mundong ito, anong alaala ang iyong iiwan? Minsan lamang tayong daraan sa buhay na ito, kaya’t kung ano mang kabutihan ang maaring mong ipakita sa ibang tao ay iyo na itong gawin dahil hindi na tayo muli pang mabibigyan ng pagkakataon na gawin ito. Masarap malaman na ang buhay mo ay naging makabuluhan para sa ibang tao. Ang kanilang buhay ay ang markang iyong iiwan sa mundong ito.

Maligayang Huwebes mga ka LP!

Congratulations to Litratong Pinoy’s Lino Almuenda! Ang kanyang mga larawan ay itinampok sa araw na ito, ika-9 ng Agosto, sa Picture Perfect ng Manila Bulletin (isa sa mga nangungunang pahayagan sa Pilipinas). Nawa ay magpatuloy pang mag-alab ang iyong pagmamahal sa potograpiya at patuloy kang magsilbing inspirasyon sa mga bagong litratista.

Silipin pa ang iba nyang mga larawan sa Lino Photography.

Ito ang mga sinasabing pampaswerte na sinasabit ng ilang Pinoy lalo na tuwing sumasapit ang Chinese New Year. Ngayong pumasok na ang “second half” ng lunar year, kamusta naman ang naging unang bahagi ng taon ninyo? Sana ay naging makulay at mapagpala ang mga naunang buwan sa inyo. Kung hindi man, bawi na lang tayo. ^^ Isipin lagi na walang malas at walang swerte… lahat ay bigay ng Diyos.

Bata man ay may ine-emote din. ^^ Nakakainggit lang dahil ang kanilang mga pinoproblema ay mas madaling solusyunan kumpara sa ating iniinda. Magka-iba man ang tindi, pareho naman tayo ng hinahangad. Solusyon. Pasasaan ba ay makakamtan din natin ito. Huwag lamang tayong mawawalan ng pag-asa.

Isang Huwebes na pawi ang lungkot ang hangad ko para sa inyong lahat.

Ang Burgos Lighthouse ay matatagpuan sa Ilocos Norte at itinayo noong panahon pa ng Kastila. Ito ay unang nagbigay liwanag noong Marso 30, 1892 sa mga galleon na naglalayag sa Cape Bojeador. Matapos ang mahigit isandaang taon, patuloy na gumagabay ang parola na ito sa mga sasakyang pandagat na naglalakbay sa northwestern most na bahagi ng Pilipinas.

Maligayang Huwebes mga ka LP.

“A man who won’t die for something is not fit to live.”

Ang mga katagang nasa itaas ay sinambit ni Martin Luther King Jr. sa kanyang autobiography. Ang bawat tao ay nangangailangan ng isang bagay na kanyang ipaglalaban hanggang sa kamatayan: paniniwala, ideolohiya, adbokasiya, o mga taong mahahalaga sa kanyang buhay. Ang bagay na ito ay magiging hugutan nya ng direksyon at inspirasyon. Hangga’t hindi ito natatagpuan, ang buhay ay maaring mauwing walang saysay.

Maligayang Huwebes mga ka LP!

Marami na kaming naging alagang aso ngunit hindi ko sila maituring na aking alagang hayop dahil hindi naman talaga ako ang nag-aalaga sa kanila. Ngunit ang flowerhorn na ito (na tinawag kong Tolits) ay masasabi kong tunay na aking alagang hayop dahil ako ang naglilinis ng tangke at nagpapakain dito.

Isa sa mahirap na parte ng pag-aalaga ay kapag nagkaroon sila ng karamdaman. Kagaya ni Tolits na nagkaroon ng gall bladder problem na naging dahilan kung bakit hindi sya makalangoy ng maayos na kinalaunan ay naging dahilan din ng kanyang pagpanaw.

–

Maging masaya nawa ang inyong mga Huwebes kapiling ang inyong mga alagang hayop.