LP 68: Proteksyon

Patapos na ang buwang Hulyo, kay bilis ng panahon ano po?! Kumusta na kayo mga kasama?! Isa na namang Huwebes ng kasayahan sa Litratong Pinoy. Muli ay pinapasalamatan ko po KAYONG LAHAT na walang sawang itinataguyod ang ating munting samahan. Hindi nyo lang alam ay nag uumapaw (ang lalim, whew!) ang saya sa aking puso (peksman, totoo po yan!) dahil sa inyong lahat, sa pagmamahal ninyo sa Litratong Pinoy. Napansin nyo ba nang magsimula ang Litratong Pinoy ay hindi na ‘corny‘ gamitin ang ating wikang Tagalog kapag nag-iiwan tayo ng komento sa mga iba’t-ibang blogs? Nakakatuwa, hindi po ba?! Sa munting paraan ay ating naitataguyod ang ating pagiging Pilipino. :=)

O sya, baka kung saan mapunta pa ang isinusulat ko. Sa Huwebes po na ito ay mayroon tayong panauhing litratista, si Bb. Marites. Kaya’t halina kayo, umpisahan na natin ang kasayahan!

————————————————–

Unang-una, isang malaking pasasalamat kay Bb. Admin sa tiwalang ibinigay sa akin para maging panauhing litratista. Isang napakalaking karangalan po ito para sa akin. Ito po ay isang magandang pangarap na hindi ko inakalang magkakatutuo ngayong taon na ito.

Ilang taon na rin akong nakikigulo ehe! nakikisaya pala sa pagdaos ng Pista ng Kadayawan. Makulay, masaya, maingay, magulo at laging maraming pagkain sa selebrasyon na ito na nangyayari tuwing ikatlong linggo ng Agosto taun-taon.

Habang nagdaraan ang mga taon ay parami ng parami ang nakikisaya kaya nasanay na rin akong makakita ng pagdami ng nagbibigay ng proteksiyon. Lahat yata ng pulis, sundalo at bombero ng aming lungsod at mga karatig-bayan ay sama-sama sa pagpoprotekta sa lahat ng nakikisaya; siyempre, kasali pa iyong mga taong nag-boluntaryo sa pagtulong para sa maganda at maayos na selebrasyon ng Kadayawan.

Nakikita sila maski saan at mas marami yata sila sa parada ng mga bulaklak at “Indak-indak sa Kadalanan”. Minsan tuloy, napagkakamalang dekorasyon sila kasama ng mga bulaklak o partisipante sa pagsayaw.

Kita ninyo naman ang mukha ng bata, mukhang takot na sa ka-indak nilang sundalo. Kailangan kasi na andon sila sa malapit. O hindi kaya takot silang lahat sa litratista?